Utdanningsval skal vere med på å skape heilskap og samanheng i grunnopplæringa og knyte grunnskole og vidaregåande opplæring betre saman. Å få prøve ut interesser og bli bevisst eigne evner og anlegg kan medverke til at fleire tek meir kunnskapsbaserte val av utdanning og yrke. Faget skal medverke til auka forståing av arbeidslivet sine krav om kunnskap og kompetanse og vere med på å skape grunnlag for entreprenørskap.
Opplæringa skal gi elevane erfaring med innhald, oppgåver og arbeidsmåtar i ulike utdanningsprogram i vidaregåande opplæring og aktuelle yrke. Ein skal gi elevane moglegheit til praktisk aktivitet og fordjuping i fag. Opplæringa i faget skal leggje til rette for at den enkelte elev kan få prøve ut og reflektere over vala sine. Opplæringa skal leggje til rette for bruk av føremålstenlege arbeidsformer, både i skole og arbeidsliv, og for bruk av ulike læringsarenaer som kan gi brei fagleg tilnærming gjennom kontakt og samarbeid med vidaregåande skolar og arbeids- og næringsliv. Faget skal leggje grunnlag for vidare opplæring, arbeid og livslang læring.
Les mer om faget på www.udir.no